Sabado, Agusto 30, 2008

Duwelo sa Parking space
Ni Ely M. Luciano
Magprangkahay Kita

Ato gisugyot dinhi nga ipa-imbistigar sa mga kadagkoan sa pulis kadtong hapit pinusilay didto sa Bajada, ning dakbayan sa Davao sa gabii niadtong Agosto 26, 2006.

Sumala sa taho nga si Police Chief Inspector Edilberto Leonardo, Team leader sa Criminal Investigation and Detection Group nagkabingkil sa mga pulis nga sila si Tamano Taug ug P01 Nelson Hadjihil sa Maguindanao Provincial Police Office nga nadestino isip mga bodyguards ni Maguindanao Vice Governor Datu Sajid Uy Ampatuan.

Sumala sa mga nakasaksi sa hitabo nga ang tulo nag-bonotay gyud sa ilang mga pusil.

Ang ilang gilalilsan nga hapit buhisan og mga kinabuhi mao lamang ang parking space sa Mercury Drug Store sa Bajada.

Kun nahinayon, dili lang sila ang nangamatay o nasamdan apan ang daghang mga customers ug mga empliyado usab sa Mercury.

Labing maayo nga masayran pinaagi sa tinuoray nga pakisusi kinsay sad-an aron ang susama niini nga hitabo dili na mausban.

Maayo man sila kay human magkasahay, naglamanohay na ug nahikalimot na sa hitabo. Apan alaut ang mga sibilyan nga hapit gikuyapan tungod sa kahadlok nga naglantaw sa kulba-hinam nga yugto.

Parking space lang pakamatyan? Unya ang nagbingkil mga peace officers ra ba. Laksot paminawon.Ambot nahimuot ba si Mayor Rody Duterte niini.

(Agusto 30, 2008 isyu)