Sabado, Agusto 30, 2008

Anti-terrorism campaign gipakusgan sa Digos

USA ka anti-terrorism seminar ang gihimo karon sa dakbayan sa Digos aron bansayon ang katawhan mahitungod sa pagpakgang sa mga terorismo.

Gipangulohan sa kapulisan ug kasundaluhan ang paghatag kanila sa mga impormasyon aron malikayan ang mga butang sama sa pagpamomba, ilabina kay kanunayng nabutang sa peligro ang dakbayan.

Dili lang sab sa mga pagpamomba gialerto ang katawhan diha sa mga kabarangayan apan lakip na ang pag-aghat kanila nga makigbisog batok sa New Peoples Army sa kabukiran.

Gisulti ni Lt. Col. Lyndon Panisa, commanding officer sa 39th Infantry Battalion, "Kini ang among pamaagi aron ipahibalo sa katawhan ang dili maayong pamaagi sa paghari sa mga NPA diha sa katilingban."

Samtang gipasabot sab ni City Police Director Anthony Padua ngadto sa katawhan nga dili gyud maayo nga suportahan ang kawsa sa mga rebelde sanglit sila ra mismo ang mahasol pag-abot sa panahon.

Bisan ang mga opisyales sa barangay, apil nga gipasabot sa kapulisan ug militar aron sila mismo ang mangunay paglihok nga dili masuportahan ang mga kontra sa gobyerno.

Samtang gipakatag na sab sa palibot sa siyudad ang mga auxiliary police diin kaabag sa kapulisan nga bantayan ang palibot ilabi na sa hulga sa Moro Islamic Liberation Front, samtang nagpadayon ang kagubot sa pipila ka dapit dinhi sa Mindanao. (Dondon Dinoy)

(Agusto 30, 2008 isyu)