Sabado, Agusto 30, 2008

MILF wa mahadlok sa ilaga
Ni Edgardo Fuerzas

ANG Moro Islamic Liberation Front wala mahadlok sa Reform the Ilaga Movement nga nagpakita og liboan ka mga sakop sa probinsiya sa Cotabato ug armado og mga tag-as nga matang sa armas.

Kini ang giluwatang pahayag ni MILF Civil Military Relations Chief Eid Kabalu.

"Kung mga daga sila pusa naman kami, di namin sila aatrasan kong mapang-abot ang aming puwersa sa North Cotabato o kahit saang bahagi ng Mindanao. Sila ang terorista gumikan sa gihimo sa maong grupo niadtong 1970," sigun ni Kabalu.

Gihagit usab ni Kumander Doruelo sa Ilaga si Kabalu nga mogawas na siya, dili motago sa sayal sa iyang lola ug atubangon sila aron iyang matilawan ang sakit sa pinaakan sa ilaga.

Gitubag usab ni Kumander Mike Santiago, tigpamaba sa Reform the Ilaga Movement atol sa gihimong pakighinabi sa Bombo Radyo Cotabato si Executive Secretary Eduardo Ermita ug DILG Secretary Ronaldo Puno.

Matud niya, ang MILF ang angayan nga dis-armahan sa gobyerno ug dili ang Ilaga nga mao'y nag-depensa sa mga inosenteng sibilyan batok sa pagpangatake sa MILF sa Aleosan ug Midsayap Cotabato.

Dugay na nga namatay ang grupo sa Ilaga apan subling nabuhi gumikan sa kagubot nga gisabwag sa mga rebeldeng MILF, diin apil ang mga pamilya sa ubang sakop sa Ilaga ang biktima sa pagpangatake sa grupo ni Kumander Ameril Ombra Kato sa North Cotabato. (Garry Fuerzas)

(Agusto 30, 2008 isyu)