Sabado, Agusto 30, 2008

Cotabato: Ideklara'ng terorista ang MILF

MIPASA og tulo ka mga bug-at nga resolusyon ang mga sakop sa Sangguniang Panlalawigan sa Cotabato, pinangulohan ni Cotabato Vice-Governor Manny Piñol aron iduso ngadto sa kagamhanan.

Ang resolusyon, may kalabutan gihapon sa seguridad ug mga panghitabo sa ilang dapit.

Unod sa resolusyon mao ang mosunod: Una, naghangyo sa kagamhanan nga i-deklarang terorista ang MILF gumikan sa pag-atake sa mga inosenteng sibilyan sa North Cotabato, Saranggani ug Lanao Del Norte, lakip na ang pagkalambigit niini sa teroristang Jemmaah Islamiyah; ikaduha, imbestigahan ang subling pag-grupo sa Reform the Ilaga Movement ug ikatulo, pag-babag sa mga lokal nga opisyal sa Cotabato nga mag-apil-apil ang mga langyaw sa suliran sa nasud.

Ilang gitumbok ang pagdapit sa International Monitoring Team ug pag-imbita sa gobyerno kang British Prime Minister Tony Blair isip mediator sa panghinabing pangkalinaw sa Mindanao.

Si Vice-Governor Piñol nagsulti nga kung sinsero ang MILF sa malinawon nga negosasyon sa suliran sa rebelyon sa Mindanao, kinahanglan nga i-surrender ang ilang mga armas una mopirma ug kasabutan sa gobyerno, lakip na nga i-turn-over niini ngadto sa otoridad sila Kumander Ameril Umbra Kato ug Kumander Bravo.

Mitubag usab ni MILF Vice-Chairman For Political Affairs Gadzaali Jaafar nga si Piñol ang terorista ug dili ang MILF, gumikan kay siya ang mibabag sa memorandum of agreement sa Ancestral Domain nga maoy solusyon unta sa kasamok sa Mindanao.

Gidugang ni Piñol nga mismo ang katawhan sa Mindanao ang nakahibalo kong kinsa ang tinuod nga terorista nga maoy nagsabwag og kasamok sa mga inosenteng sibilyan. (Garry Fuerzas)

(Agusto 30, 2008 isyu)