Sabado, Oktubre 11, 2008

Di matagna ang kamatayon
Ni Jenefer L. Besere
Labtik

MAO ning giingon nga kong oras na nga kuhaon ang imong kinabuhi, dili na gyud nimo kini mabalibaran ug malikayan bisan pa kong anaa ka lang sulod sa imong balay. Bisan pa kong natulog ka lang mahimo ka nga makabsan sa imong kinabuhi kong imo na gyud nga panahon.

Akong mahinumduman si Konsehal Zaldy Ocon sa iyang linya atol sa iyang mga programa sa radyo nga "patay karon, patay ugma, mao rang pataya'. Tinuod gyud, wala kita masayod nga karong adlawa mao na diay ang atong kataposan.

Sama niadtong usa ka amahan nga si Epefanio Salazar kinsa empliyado sa City Engineering Office nga nakabsan sa kinabuhi human nahulog sa building nga iyang gitrabaho. Matod sa anak ni Salazar nga nahinabi sa Sun.Star Superbalita, walay pamilin-bilin nga estorya ang ilang amahan dihang nilakaw kini sa ilang balay niadtong maong adlaw. Gani naanad na sila niini nga kanunay magpasiaw og estorya.

Kinsay magdahom nga pipila lang ka oras gikan sa iyang pagbiya sa ilang balay makabsan na diay kini sa kinabuhi.

Sama usab sa nahitabo diha sa Tagbocboc, Talisayan, Misamis Oriental. Wala mahitsura ang lawas sa usa ka babaye human kini naputol ingon man nabuak ang ulo sa lalaki human naligiran sa ten wheelers truck.

Giingong nagtingdog-tindog daplin sa karsada ang duha ka mga mga tigulang nga biktima dihang naligid ang trak nga giingon nilikay sa gikasugat nga laing trak.

Sayo pa intawon sa buntag ang maong hitabo ug sigurado nga mao pa ang pagmata sa mga biktima gani wala pa siguro kadto nakapamahaw. Kinsa ba intawon ang nagdahom sa maong mga biktima nga kutob na lang sila niadtong orasa.

Usahay ato sab nga masala ang pikas parte sama niining nagmaneho sa maong trak tungod kay nagdanghag lang usab sa iyang pagmaneho. Responsibilidad man unta sab sa maong drayber ang kaluwasan sa iyang biyahe. Apan mao lagi dili gyud nato mapugngan ang kamatayon, maayo unta kong andam kita kanunay sa pag-abot niini nga panahon.

(Oktubre 11, 2008 isyu)