 |
Sabado,
Oktubre 11, 2008 |
2 estudyante gitulis
KAHADLOK ang gibati sa duha ka estudyante human gitulis sa duha ka mga wala mailhing suspetsado niadtong niaging adlaw mga alas 7:00 sa gabii sa CM Recto-Lapasan ning siyudad sa Cagayan de Oro.
Si SPO1 Edilberto Barela sa Police Station 3 (PS3) sa Agora niila sa duha ka mga estudyante nga mao sila si Krean Cabalang, 16, taga 0541 Barra, Macabalan ning siyudad ug Degie Macad, 17, taga Cugman, ning siyudad, pulos nagtungha sa Mindanao Polytechnic State College (MPSC).
Nasayran nga samtang nagbaklay gikan sa ilang eskwelahan padulong sa usa ka mall, kalit lang silang giatangan sa duha ka mga lalaki ug ang usa niini niduol kanila human nition og kutsilyo.
Nideklarar kini og tulis human gipangayo ang ilang mga cellphone nga wala pa matino kung pila ang kantidad.
Tungod sa kahadlok ug kakulba nga gibati daling gihatag sa duha ang ilang mga cellphone.
Human nagmalampuson ang mga tulisan sa ilang mga tinguha, deretso kining nisibat agi sa dalan Lawesbra, Lapasan ning siyudad.
Kini nga kaso padayon pang giimbestigahan sa kapolisan sa PS3 aron pag-ila sa duha ka tulisan ug pagsikop kanila. (SVB)
(Oktubre 11, 2008
isyu)
