 |
Sabado,
Oktubre 11, 2008 |
6 anyos gimolestiya
Ni Stephanie Viovicente-Berganio
GIANGKON sa usa ka lolo ang iyang gihimong pag-abuso sa saes anyos nga bata niadtong Huwebes sa Purok-3B, Gusa ning siyudad sa Cagayan de Oro.
Gisikop sa mga sakop sa Police Station 3 (PS3) sa Agora si Demetrio Aceves, 66, balo, nagpuyo usab sa susamang dapit.
Ang biktima giila nga si Diana (tinuod nga ngalan gipugngan), 6, molupyo sa susamang dapit.
Sa gihimong pakighinabi sa Sun.Star Superbalita ngadto sa suspetsado, siya misugilon nga wala niya gilugos si Diana ug igo lamang niya gihalokan ang kinatawo niini.
Matud ni Aceves nga nagdula-dula sa iyang lugar ang mga bata uban si Diana mga alas 3:00 sa hapon dihang iyang giduolan ang biktima ug gihatagan og kwarta aron ipalit sa makaon niini.
Human nakapalit og makaon ang biktima, iya kining gihangyo nga ubanon sa iyang lawak.
Matud sa suspetsado nga wala usab nidumili si Diana ug gisugdan gilayon niya ang pagtilap sa kalawasan niini nga miabot ngadto sa kinatawo sa bata.
Gibutyag ni Aceves, nga naghigda sa iyang katre si Diana ug siya nagtindog lamang samtang nag-among-among sa bata.
Giingong tungod sa kasakit nga gibati ni Diana sa gihimo sa lolo, nisumbong kini ngadto sa iyang inahan.
Ang inahan mismo ni Diana ang nangayo gilayon og pakitabang sa Barangay.
Human sa hitabo, diretso usab nga gisikop sa kapolisan sa PS3 si Aceves.
Samtang gibutyag ni PO3 Raagas sa Police Station 3 sa Sun.Star Superbalita nga posibleng kasong rape ang ipasaka batok sa suspetsado ug mismo ang pamilya sa biktima andam gayud sa pagpasaka og kaso batok niini.
(Oktubre 11, 2008
isyu)
