TANGGONG sa selda ang usa ka batan-ong lalaki kinsa gituohang kawatan, samtang nakaikyas ang lain pa niyang kaubanan sa dihang gigukod sa tag-iya sa balay nga ilang gikawatan sa Barangay San Isidro, dakbayan sa General Santos, kagahapon sa kaadlawon.

Ang suspetsado giila sa kapulisan nga si Ricky Gangtalao, 18, ug taga-Lun Padidu sa Malapatan, Sarangani Province. Ang reklamante mao si Ganny Granahan, 31 anyos, habal-habal drayber, ug molupyo sa Purok Masunurin sa Barangay San Isidro, ning siyudad.

Sa impormasyon nga nahipus gikan ni PO1 Ariel Beldera, sa San Isidro Police Station, gibutyag niini nga nahitabo ang insidente alas 12:15 sa kaadlawon samtang pauli na sa iyang balay ang reklamante.

"Nakasugat pa sa reklamante ang duha ka mga suspect, nagbitbit daw og duha ka litro nga softdrinks. Natingala siya kay gikan man daw dapit sa ilang balay unya sarado na man ang ilang tindahan, nganong nakapalit pa og softdrinks. Midali-dali siya og uli unya nakit-an niya nga nagkagubot na ang sulod sa iyang balay," sumala ni Beldera.

Gikatahong gipukaw sa reklamante ang iyang asawa, nga niadtong tungora, nahinanok na sa pagkatulog. Nasuta usab sa reklamante nga nawala na ang ilang duha ka mga cellphone ug pitaka nga dunay sulod nga kantidad nga P5,000.

Midali-dali ang reklamante ug ang asawa niini nga sundan ang duha ka mga batan-on ug ila kining nakit-an nga nagpadulong sa ngitngit nga kasagbutan nga bahin sa ilang lugar.

"Pagkakita niya nga nagkagubot na ilang balay ug ilang tindahan, iya dayon gipukaw iyang asawa, wa man daw kabalo, mao nga migawas dayon sila ug gisundan ang duha ka mga suspek," pahayag ni Beldera.

Giingong nakamatngon ang duha ka mga suspek nga dunay nagsunod kanila hinungdan nga nanagan kini, apan way swerte si Gangtalao tungod kay naabtan kini sa reklamante.

Samtang sa pagtugyan sa reklamante sa suspetsado ngadto sa buhatan sa pulis, wa nakuhaan ang reklamante og bisa'g unsa nga butang nga nangawala gikan sa panimalay sa reklamante. Dako ang pagtuo sa reklamante nga gitangag sa kauban sa suspetsado ang ilang mga cellphone ug kuwarta.

"Mora'g way plano ang reklamante nga magapasaka og kaso. Ginaimbestigahan pa usab ang nadakpan kay way klaro ang tubag kung pangutan-on, ingon niya 18 iyang edad tapos, nagsulti na pod siya nga 17, ato pa ning klaruhon unsa gyud," sulti sa pulis.