USA ka gituohang isnatser ang tanggong karon sa selda human nadakpan sa merkado publiko sa dakbayan sa General Santos samtang misuway og ikyas sa babaye nga iyang gilabnihan og cellphone niadtong milabay'ng hapon.

Ang suspetsado mao si Ryan Mamitla, 37, ug molupyo sa Purok Islam sa Barangay South ning siyudad. Ang nagreklamo giila nga si Irene Bangotig, 18, ug molupyo sa Silway, Barangay Dadiangas West sa dakbayan.

Sa taho nga nahipus, ang batan-ong biktima naglakaw sa merkado publiko kauban ang higala niini nga si Aida Laurenzada, alas 4 sa hapon.

Apan samtang naglakaw, kalit lamang sila gitaparan sa suspetsado dayon labni sa cellphone sa biktima nga nagkantidad og P1,600.

Midagan ang suspetsado apan misiyagit usab ang biktima nga nangayo og tabang hinungdan nga napukaw ang atensiyon sa mga tawo sa palibot.

Una pa nakaikyas ang suspetsado, nadakpan kini sa pipila ka mga tawo ug wala nagdugay giduso sa istasyon sa pulis aron ma-imbestigahan.

Samtang didto sa buhatan sa pulis, nabawi sa biktima ang iyang cellphone.

Si PO1 Joel Pomatong sa Bula Police Station, nagsulti sa Superbalita nga napasaka na ang kasong snatching batok sa suspetsado nga nagtingkagol sulod sa selda kauban ang lain pang piniriso. (JGRS)