NAGPATAMBAL ang usa ka sakop sa Traffic Management Group (TMG) human nabanggaan sa gimanehong motorsiklo sa usa ka sakop sa Philippine Army samtang nagbantay og checkpoint sa Barangay Tambler sa dakbayan sa General Santos niadtong Lunes sa buntag.

Ang biktimang si SPO4 Philip Barreto, molupyo sa Do¤a Soledad Subdivision sa Barangay Labangal, ning siyudad, ug sakop sa TMG, mao mismo ang mipatala sa hitabo ngadto sa buhatan sa Tambler Police Station ug nagtug-an nga nabanggaan siya sa gimanehong motorsiklo ni Pfc. Benjamin Lasam, taga-Sentro Enrile, Cagayan Valley, ug nadestino sa 5th Infantry Battalion sa Philippine Army.

Sa impormasyon nga nahipus gikan ni PO2 Edgardo Baguiran, sa Tambler Police Station, nasuta nga nahitabo ang insidente alas 8 sa buntag sa National Highway sa Barangay Tambler haduol sa Alliance nga simbahan.

"Nag-conduct ang TMG og anti-carnapping checkpoint didto sa area. Miabot ning sakop sa army nga sakay sa motorsiklo.

Gi-flag down ni Barreto pero wala nihunong ug nabanggaan pa siya," sumala ni Banguiran.

Sulti ni Banguiran, wala naka-uniporme ang sundalo ug padulong kini sa usa ka beach resort sa Tambler kay dunay tambongan nga kasaulogan sa dihang nahitabo ang insidente.

"Dili man magpasaka og kaso ang biktima. So far, walay report nga naay settlement nga nahitabo pero sa among pagkabalo, nag-assist ang sundalo sa initial medication sa biktima sa ospital," butyag ni Banguiran kinsa nagdugang nga dili kaayo grabe ang mga naangkon nga samad sa biktima.
(JGRS)