SWERTENG wa mapurohi ang drayber sa habal-habal human siya gidunggab sa gawas sa videokehan sa Makar, dakbayan sa General Santos kagahapon sa kaadlawon.

Giila ang biktima nga si Antonio Ason, 35 anyos, ug molupyo sa Purok San Vicente sa Barangay Labangal, ning siyudad.  Ang suspetsado nailhan lamang sa ngalan nga alyas Tata, hamtong usab ang pangidaron, ug taga-Purok Bagong Silang sa susamang barangay.

Si PO2 Amil Bahar, sa Makar Police Station, nagtug-an sa Superbalita kagahapon nga ang biktima naglingkod lamang sa gawas nga bahin sa Capricorn KTV Bar pipila lamang ka metros ang gilay-on sa ilang buhatan.

Apan kalit lamang miatake ang suspetsado ug gidunggab ang biktima sa lawas niini.

"Nakalikay ning biktima ug wala gyud siya mapurohi sa suspetsado. Natapsingan lang ni siya sa kutsilyo sa right side sa iyang abdomen," sumala ni Bahar.

Dugang sa pulis nga wala nakaila ang biktima sa suspetsado ug ang mga saksi lamang ang miila niini nga usa ka alyas Tata nga taga-Purok Bagong Silang sa Barangay Labangal.

"Dili niya kaila ang biktima ug wala sab siya'y atraso sa maong tawo ug sa iyang pagtuo, gi-tripan lang siya sa suspetsado," sulti ni Bahar.

Wa na hatagi og ikaduhang higayon sa biktima nga maduslak pa siya sa suspetsado mao nga mikaratil na kini og dagan padulong sa buhatan sa pulis aron mangayo og tabang.

"Gibilin niya iyang motor didto ug nangayo og tabang dinhi. Pag-responde namo sa lugar, wala na didto ang nagdunggab, nakaikyas na," sumala ni Bahar.

Ang biktima mipadulong sa balay tambalanan aron magpatambal sa iyang samad human gipatala ang hitabo sa buhatan sa pulis.

"Naa na sa biktima kung magpasaka ba siya og kaso kay identified man ning suspek ug nasayran na pod kung asa nagpuyo, kumpleto na man pod ang mga dokumento, naa na siya'y police blotter dinhi, depende na sa iyaha kung kasuhan ba niya," asoy sa pulis.

Gibutyag usab sa pulis nga narekober sa biktima ang iyang motor nga iyang gibilin sa nahitaboan sa insidente.