ANG mantalaang Sun.Star Superbalita miyukbo karon sa mga opisyal ug mga molupyo sa dakbayan sa General Santos nga nasaulog sa Kalilangan Festival.

"Pagbabalik Gunita sa Pitumpung Taon ng Kapayapaan, Kaunlaran at Kasiyahan" maoy tema sa ika-70 ka tuig nga pagsaulog sa Foundation Anniversary sa dakbayan.

Karong adlawa usab, ang Sun.Star Superbalita-Gensan magsaulog sa ika-lima ka tuig nga kasumaran sa pagkatukod niini.

Tungod niini, mga kawani sa Superbalita, pinangulohan ni General Manager Joey Griño, OIC Florence Villarin, Ranelyn Acharon, ug Rex miduyog sa mga kalihukan atol sa Kalilangan.

Isip pasalamat sa katawhan tungod sa way puas nga pagpaluyo niini, mga personahe sa Superbalita manghatag og mga mantalaan nga way bayad.

Daghang mga pahalipay usab gitagana niini sa umaabot nga mga adlaw ngadto sa katawhan.

Ang Superbalita, isip mantalaan sa tibuok pamilya, magpadayon sa pagsilbi sa katawhan sa siyudad sa GenSan, lalawigan sa Sarangani, South Cotabato ug ubang kasikbit nga lugar pinasubay sa maayong lagda sa journalism.

Isip mantalaan sa tibuok pamilya, among ipasalig nga bisan ang mga batan-on mahimong mobasa sa Superbalita tungod kay wa ug dili kini magbatun sa mga butang nga makadaut kanila.  

Ato usab pahalipayan ang mga opisyal sa dakbayan pinangulohan ni Mayor Pedro Acharon Jr., bise mayor, ug mga konsehal tungod sa pag-uswag sa dakbayan ug sa kalampusan sa Kalilangan.