PANIMALOS ang hinungdan nganong gipatay ang usa ka ulitawo kinsa giingon nga maoy nakadunggab sa suspetsado sa alas 4:00 sa kaadlawon niadtong Lunes.

Ang insidente nahitabo samtang naglakaw ang biktima atubangan sa Gewm Eggs, Barangay 31-D Poblacion, siyudad sa Davao.

Ang biktima giila sa kapulisan nga mao si Jake Alahas Bacolod, 18, out-of-school youth, nagpuyo sa San Isidro, Barangay Leon Garcia, siyudad sa Davao.

Base sa imbestigasyon ni PO3 Richard Dionisio sa Sta. Ana Police Station, ang biktima malipayon naglakaw kauban ang iyang hinigugma nga si Novie Muit, 20, nagpuyo sa Rosemarie, Barangay Agdao Proper.

Giingon nga kalit miabot ang suspetsado nga si Junnil Dagupan ug didto gidunggab ang biktima duha ka higayon sa iyang likod ug usa sa iyang kilay.

Si Bacolod natumba sa daplin sa kalsada dayon miikyas sa ng suseptsado ngadto sa wala matinong lugar.

Ang biktima daling gidala sa iyang hinigugma didto sa San Pedro Hospital apan gideklara sa mga doktor nga patay na siya dihang miabot sa tambalanan.

Sa gihimong follow-up operation sa kapulisan, ang suspetsado daling nasikop ug gibalhog karon sa selda sa Sta. Ana Police Station.

Si Dagupan positibong gitudlo sa hinigugma sa biktima nga maoy midunggab patay ni Bacolod.

Ang suspetsado nagsulti sa mga otoridadd nga nahimo niya ang pagpatay sa biktima gumikan kay gidunggab siya sa namatay kaniadto.

"Mibalos lang ko sa iya kay iya man kong gidunngab," suma ni Dagupan dihang gipangutana sa mga tigbalita.

Giandam na ang kasong murder batok sa suspetsado aron ipasaka ngadto sa korte. (AD)