USA ka lalaking tag-iya og minahan ang gipusil sa iya ra sab nga kaila didto sa Barangay Mainit, lungsod sa Maco, Comval Province.

Ang biktima mao si Gregorio Cardenas Jr., alyas Goring, hamtung ang panuigon, ug molupyo sa Purok 3, Barangay Teresa, lungsod sa Maco.

Samtang ang suspek giila nga si Rodrigo Comania, alyas Rudy, molupyo sa Barangay Mainit, sa maong lungsod.

Sa report gikan sa Comval Province Police Provincial Office nasayran nga pasado alas 4:45 sa hapon niadtong Sabado, gipusil ang biktima sa suspek gamit ang .30 caliber rifle.

Nahitabo ang pagpamusil atubangan mismo sa panimalay sa suspek.

Sumala pa nga atol sa pagpamusil ang biktima sakay sa usa ka motor nga gidrayban sa iyang trabahador nga si Vicente Arguilles.

Ang biktima nahiagum og samad pinusilan sa iyang dughan nga miresulta sa iyang kamatayon.

Human sa pagpamusil ang suspek mitahan sab sa iyang kaugalingon ngadto sa head security sa Apex Mining sa may Barangay Masara, alas 11:45 na sa udto aron atubangon ang salaod nga nahimo.

Gitugyan dayon ngadto sa mga otoridad ang suspek aron ma-imbestigahan ug mapahamtangan og silot. (Marvin Pineda)