USA ka lalaki ang nadala sa ospital human gipusil sa wa mailhing mga suspetsado samtang nagbaktas didto sa Barangay Pagsabangan, dakbayan sa Tagum.

Ang biktima nailhan nga mao si Kempee Moral, hamtung ang panuigon ug molupyo sa Purok Abarida, sa maong barangay.

Sumala sa report gikan sa Tagum City Police Station nga nahitabo ang pagpamusil pasado alas 3:00 sa kaadlawon niadtong Sabado.

Nagbaktas ang biktima kuyog ang iyang ig-agaw didto sa nahisgutang dapit sa dihang kalit nga miabot ang wa mailhing lalaking lulan sa Honda Wave nga motor nga way plate number ug gipusil ang biktima.

Ang biktima nahiagum og samad pinusilan sa kalawasan ug gidala dayon sa Davao Regional Hospital sa may Barangay Apokon aron mapatambalan.

Human sa pagpamusil ang mga suspek abtik nga misibat padulong sa wa matinong lugar.

Kapulisan sa siyudad sa Tagum mihimo na karon og pakisusi aron masayran ang motibo ug masikop ang mga susepk sa  pagpamusil.

Samtang gilusad na usab ang manhunt operation sa kapulisan aron sa pagpangita sa suspek. (Marvin Pineda)