GUMIKAN sa bikil mahitungod sa gitikad nga yuta, usa ka tawo ang midangat sa tambalanan human siya gidunggab sa alas 6:00 sa gabii niatong Lunes.

Ang biktima mao si Romeo Tagod, 44, minyo, mag-uuma, nagpuyo sa Purok 11, Sitio Ekal, Barangay Wangan, distrito sa Calinan, siyudad sa Davao.

Sa imbestigasyon ni PO3 Orlando Madrazo sa Calinan Police Station, nailhan ang suspetsado nga mao si Edwin Salgado, 25, ultitawo, mag-uuma, nagpuyo sa Barangay Cawayan, ning siyudad.

Si Madrazo nagbutyag sa iyang investigation report nga gikompronta sa biktima ang suspetsado mahitungod sa gitikad nga yuta ug ang maong panagkita miresulta sa panaglalis sa duruha.

Unang miatake ang biktima ngadto sa suspetsado apan nadakin-as sa yuta mao nga natumba siya ug didto na nakahigayon ang suspetsado sa pag-ibot og kutsilyo dayon gihansakan ang biktima.

Si Tagod naigo sa iyang dughan mao nga gidala siya didto sa Isaac Robillo Hospital sa Calinan diin gideklara siya sa mga doktor nga anaa sa talandugon nga kahimtang.

Sa pagresponde sa kapulisan, ilang nasikop ang suspetsado ug gitanggong karon sa selda sa Calinan Police Station.

Giandam na ang kasong frustrated murder sa kapulisan aron ipasaka batok sa suspetsado ngadto sa korte.(AD)