DRAYBER og tricycle kalit lang gidunggab sa iyang silingan tungod sa miinit nga panaglalis human nag-krus ang ilang dalan didto sa Barangay Savoy, lungsod sa Matanao, Davao del Sur.

Mga alas 10:30 ang takna sa buntag niadtong Dominggo sa dihang nagtagbo ang biktima nga si Edoracio Olie, 38, ulitawo ug ang suspek nga si Reynante Sol, 36, minyo ug pulos mga lumolupyo sa Barangay Poblacion, Matanao.

Si Inspector Melgrace Driz, hepe sa kapulisan, nisulti nga gidunggab sa suspek si Olie sa likod nga bahin sa iyang lawas apan swerte kay wa kini naantimano ug nahatod pa sa Davao del Sur provincial hospital.

Pulos sakop sa tribong B'laan ang duha apan personal nga nagkabangi sa di matinong hinungdan.

Hinuon, wa na mahago ang kapulisan sa pagsikop sa suspek human boluntaryo kining nitahan ngadto sa barangay kapitan sa ilang lugar.

Wa sab magdugay gitunol dayon sa ilang opisyal sa barangay ang suspek ngadto sa presento sa kapulisan.

Nagpaalim karon ang biktima sa samad dinuggaban nga nahiagoman ug gihikay na sab sa kapulisan ang kaso aron masang-at na kini didto sa Provincial Prosecutors' Office. (Dondon Dinoy)