USA ka drayber ang midangat sa tambalanan human gipusil sa wala mailhing tawo sa alas 11:00 sa gabii niadtong Biyernes disto sa New Argao Village, Barangay Maa, siyudad sa Davao.

Ang biktima giila sa kapulisan nga mao si Joel Suma Limimbay, 28, ulitawo, nagpuyo sa Muslim Village, San Rafael, Barangay 9-A Poblacion, ning siyudad.

Si SPO1 Reynaldo Gustilo, imbestigador sa Talomo Police Station, nagbutyag sa iyang spot report nga ang biktima nakaangkon og samad pinusilan sa iyang likod.

Ang biktima giingon nga walay panimuot dihang napalgan sa kapulisan hangtud na didto sa Davao Medical Center (DMC) diin kasamtangan siyang giobserbahan karon sa mga doktor.

Si Dionisio Davis, 20, ulitawo, nagpuyo sa maong lugar nagbutyag sa kapulisan nga natugaw ang iyang pagpahulay niadtong gabhiona dihang nakadungog siya og buto sa armas duol sa South Point School of Davao.

Tungod sa maong buto, suma ni Davis, iya kining gisusi ug maoy misugat sa iyang panan-aw nga nagbuy-od ang biktima daplin sa kalsada.

Si Davis nagpahibalo dayon sa iyang mga silingan ug nangayo og police assistance sa Central 911 aron imbestigahan ang maong krimen ug dalhon ang biktima sa tambalanan.

Mga imbestigador sa Talomo Police Station naningkamot karon nga makahipos og impormasyon gikan sa biktima aron masayran kung kinsa ang mga tawo nga buot mopatay kaniya. (AD)