ANG Davao del Sur Provincial Police Office (DDSPPO) nagtaho nga way dagkong panghitabo atol sa kasaulugan sa All Saints Day ug All Souls Day niadtong Nobyembre 1 ug 2.

Sa gipagulang impormasyon sa kapulisan kagahapon sa buntag, gipasigarbo niini nga malinawon gyud ang tibuok probinsya sa duha ka adlaw nga paghinumdom sa adlaw sa mga minatay.

Si Senior Supt. Ronald Dela Rosa, provincial police director, nikumpirma nga malampuson ang gipatumang hugot nga pagbantay sa kapulisan sa tanang sementeryo sa matag lugar.

Alang nila, nilampus ang ilang gi-implementar nga Oplan Kaluluwa. Ubos niini, ilang gitutukan og maayo ang pagbantay sa mga tawong magdala og mga hait nga hinagiban atol sa ilang pagbisita sa mga sementeryo.

Unang nagpatawag og tigum ang pamunuan sa DDSPPO ngadto sa tanang hepe aron mapatuman ang istriktong seguridad.

Gidili gyud sa kapulisan nga dad-on didto sa mga sementeryo ang mga ilimnong makahubog, kutsilyo, sound system ug uban pa nga makaresulta sa kasamok, kagubot sa lugar.

Didto sa siyudad sa Digos, wa gitugtan sa lokal nga gobyerno nga adunay mag-vigil nga mga tawo sa sementeryo pag-abot sa kagabhion.

Sa matag lungsod gipatuman sab sa kapulisan ang curfew gikan alas 6 sa gabii niadtong Nobyembre 1 hangtud alas 5 sa buntag, Nobyembre 2.

Namatikdan hinuon sa kapulisan nga mingaw ang pagsaulog sa kalag-kalag ug gituohang tungod kini sa ka-krisis sa panahon.

Menus sab ang mga tawong mi-biyahe mao nga wala magdasok ang mga terminals.

Nagpasalamat og dako ang kapulisan kay natuman ang ilang tinguha nga magmalinawon ang lalawigan sud sa duha ka adlaw selebrasyon. (Dondon Dinoy)