WALA na makapanalipud sa iyang kaugalingon ang usa ka miyembro sa Civilian Volunteers Organization (CVO) human siya gipusil patay sa mga armado didto sa Kudon, Lebak, Sultan Kudarat Province.

Subay sa report nga nakuha sa Superbalita, ang biktima giila sa kapulisan nga si Menardo Andrade, 42 anyos, molupyo sa maong lugar.

Sumala pa nga alas 8:00 sa gabii, Lunes nakadesisyon ang biktima nga mopauli una sa ilang panimalay.

Samtang paggawas na kini sa outpost nga iyang gibantayan, wala damha nga duha ka armado ang nag-atang kaniya.

Way daghang istorya, ang biktima gipaulanan og mga bala sa mga suspek gamit ang M16 armalite rifles.

Si Andrade nga natusak-tusak sa mga bala ang lawas namatay diha-diha dayon ug wala na gyud matabang pa. Mga suspetsado sa wala pa miikyas giapil og dala ang gi-isyung M1 carbine rifle ngadto sa biktima.

Kapulisan sa Sultan Kudarat nanaghap nga posibleng personal nga atraso ang hinungdan nganong gipatay ang CVO.

Apan wala sab gipadaplin sa otoridad ang posibilidad nga mga miyembro sa lawless MILF group ang mitipi sa biktima.

Sumala pa nga dugay ng nahitabo sa dapit ang bangi tali sa mga Muslim ug Kristiyano.

Kapulisan padayong naningkamot aron madakpan ang mga suspek. (Edgardo Fuerzas)