USA ka babaye natibway ang kinabuhi human gitigbas sa lalaking nag-abang sa ilang bay didto sa dalang Ramon Delos Cientos, Barangay Poblacion Dos, lungsod sa Bansalan, Davao del Sur.

Sa nahipus nga impormasyon sa Sun.Star Superbalita, nasuta nga mga alas 7 sa buntag niadtong Dominggo, nahitabo ang init nga panaglalis tali sa biktima ug suspek.

Si Chief Inspector Solomon De Castilla, hepe sa Bansalan police station, nag-ila sa biktima nga si Marialyn Suralta, 48, minyo ug usa ka negusyante sa lugar.

Matud ni De Castilla, nga ang suspetsadong si Jerry Bagacay, 26, taga Sitio Mabolo, Barangay Albagan, didto sa lungsod sa Tampakan, South Cotabato kalit lang mikuha og "lagaraw" og didto gitigbas ang biktima.

Matud ni De Castilla nga ang biktima nahiagum og daghang mga samad tinigbasan sa nagkadaiyang parte sa iyang lawas.

Gidali pa siya og dala sa ospital aron nga mapatambalan, apan gideklara ra sab kini nga patay na dihang nahidangat sa balay tambalanan.

Kapulisan nga nagsubay sa insidente nakakuha og duha ka mga sundang nga pulos nagkadugo.

Gituohang mao kadto ang gigamit sa suspetsado sa pagtigbas patay sa biktima.

Ang suspetsado nga nagtingkagol karon sa selda, dihang gihinabi nagkanayon nga naupos na ang iyang pailob sa batasan sa biktima kinsa maoy tag-iya sa panimalay nga iyang gi-abangan.

"Dugay ra man gud ko niyang ginapasakitan og istorya mao to anang buntaga (Dominggo), naglalis na pud mi so gipangutana nako siya unsa gyud iyang gikasuko nako, pero nag-wild man hinuon siya," matud sa suspek.

"Nawala ko sa akong kaugalingon mao nahitabo to," dason sa suspek.

"Ako pa gani siyang gi-ingnan ayaw ko ingon anaa kay dili ko pareha sa uban, wa man gyud sige gihapon yawyaw," niya pa.

Gisuwayan sa Superbalita og kuha ang bahin sa bana sa biktima apan nidumili una kini sa pagluwat og pahayag. (Orlando B. Dinoy)