PITO ka mga tawo ang nasamdan human mibusikad ang usa ka granada didto sa barangay Rosary Heights, Cotabato City, ala 1:05 sa hapon niadtong Lunes.

Mga samdang biktima giila sa kapulisan nga sila Norma Adzis 50 anyos, Norhaya Adzis 41, Unisalam Lagian, 60, Bailiza Lagian 15, Bailanie Sampulna, 5, Bai Unde Sampulna, 7 ug Angkil Radjack, 16 anyos ang panuigon.

Subay sa gihimong imbestigasyon sa otordidad, banda ala 1:05 sa hapon niadtong Lunes duha ka mga suspek nga sakay sa XRM nga motorsiklo ang way pagduha-duha nga miitsa sa maong granada sa panimalay ni Lacson Bandila.

Ang insidente miresulta sa pagka-angol sa pito ka mga biktima.

Mga suspek human nga nagmalampuson sa ilang tumong, abtik sab kaayong nakapasirit og padagan sa ilang gisakyang motor paingon sa wala matinong direksiyon.

Mga biktimang samdan sa pagbusikad gidali og dala sa Cotabato Regional and Medical Center.

Nagpabilin sab nga talandugon ang kahimtang sa duha ka mga biktima nga wala na giyagyag pa ang mga ngalan niini.

Pahayag ni City Police Director Willie Dangane nga posibleng awayan sa pamilya ang hinungdan sa pagpanglabay og granada.

Gipasalig hinuon nila nga tutukan pag-ayo ang kaso aron mahatagan og kasulbaran ang krimen, mailhan sab ang mga tawong nagpaluyo sa krimen. (Edgardo Fuerzas)