GIDALA na sa Manila kagahapon si kanhi Compostela Mayor Gilbert Wagas aron ipresentar sa Sandiganbayan human gisikop sa mga ahente sa National Bureau of Investigation (NBI) 7 tungod sa iyang pagpakombikto sa kasong malversation niadtong 2001.

Nasayran sa Sun.Star Cebu nga si Wagas gipabalhog dayon sa Sandiganbayan ngadto sa National Penitiary sa Muntinlupa.

Sun.Star accepts donations for victims of Typhoon Ondoy

Mga alas 10 kagahapon sa buntag gihatod sa tulo ka mga ahente sa NBI 7 si Wagas agi sa Mactan Cebu International Airport nga giubanan nilang NBI Agent Arnel Pura.

Ilang gipusasan ang kanhi mayor.

Si NBI 7 regional director Medardo de Lemos namahayag nga ipresentar ang kanhi mayor ngadto sa Sandiganbayan aron mao na ang modesider ning iyang kaso.

Gihulagway ni Wagas nga “recycled bench warrant” ang gigamit sa pagsikop kaniya nga gipetsahan pa niadtong Hulyo 2, 2003.

Gitumbok niya nga ang bench warrant kutob ra kini sa 10 ka adlaw nga magamit.

Iyang gipahibawo nga may gisang-at sila nga omnibus motion sa Korte Suprema.

Subay niini, si Atty. George Bragat, abogado ni Wagas, namahayag nga kwestyunon nila sa korte ning nahiaguman sa iyang kliyente.

Si Wagas nitumbok nga “politically motivated” ang pagsikop niya niadtong milabayng adlaw tungod sa iyang tinguha na usab nga magpapili sa pagka-kongresista batok kang Kong. Ramon “Red” Durano VI sa ikalimang distrito.

Giingong nangita og dokumento ang iyang mga kaatbang sa giatubang niyang kaso sa Sandiganbayan.

Bisan niini, namahayag siya nga mosang-at gyod siya sa iyang sertipiko de kandidatura alang sa sunod tuig nga piniliay ug di makapugong ning iyang pagkasikop karon. (JECT)