PROTEKTADO og usa ka taas nga opisyal sa kapulisan sa Siyudad sa Sugbo ug mga barangay official ang barangay tanod sa Lorega nga gitumbok nga maoy nipusil patay sa usa ka gidudahang esnatser sa miaging kaadlawon.

Mao kini ang gibutyag sa usa ka kasaligan nga tinubdan nga nibisita ug gikahinabi sa Sun.Star Superbalita apan di gustong nganlan.

Sun.Star accepts donations for victims of Typhoon Ondoy

Si Bryan Mabaga mao ang giakusahang nipusil patay kang Eric Fuentes, 25, taga brgy. Camputhaw, siyudad sa Sugbo.

Si brgy. capt. Fritzgerald Herera gitawgan sa makadaghang mga higayon ning mantalaan sa iyang buhatan, apan kanunay kining wa diha, matod sa mga kawani nga nakatubag.

Ang ngan sa police official gipugngan una samtang wa pa makuhaig reaksyon.

Matod pa sa maong tinubdan nga nadakpan na pipila ka tuig ang nakalabay si Mabaga, apan nabuhian human giareglo sa usa ka opisyal sa kapulisan ang iyang pagkasikop.

Dugang sa tinubdan nga makadaghan na malambigit sa pagpamusil si Mabaga, apan way ni bisan usa kanila ang nipasaka og kaso.

Giingong kanunay kini magdala og armas panahon nga maglakawlakaw tungod sa kabalaka nga mapanimaslan sa mga kabanay sa iyang napusilan nga wa mopasaka
kaniya og kaso ug nagbilin sa hulga nga panimaslan.

Si Mabaga gitumbok nga aktibo nga sakop sa usa ka grupo nga “anti crime volunteer” nga gipaluyohan sa usa ka opisyal.

Siya gidudahang responsable sa mga pagpamusil sa gidudahang mga badlungon diha sa ilang barangay.

Ang iyang mga kauban nga mga barangay tanod wa mokumentaryo sa mga pasangil nga nalambigit siya sa mga pagpamusil sa ilang barangay.

Apan ilang gihulagway nga aktibo kini sa kampanya batok sa krimen sa ilang barangay ug kadaghan na usab makasikop og badlungon.

Ang Sun.Star Superbalita nisuway sa pagkuha og reaksyon kang Herrera ug uban pang mga barangay official, apil na unta si Mabaga, apan pulos sila namalibad.

Si Barangay Kapitan Lorenzo Basamot sa Camputhaw nihulagway kang Fuentes nga badlungon sa ilang Barangay ug gilambigit sa mga pagpanglabni.