NAUSAB ang hunahuna ni 7-footer Greg Slaughter ug nakahukom kining moduwa gihapon sa University of the Visayas (UV) Green Lancers alang sa 2010 season sa Cebu Schools Athletic Foundation Inc. (CESAFI).

Mao kini ang gipabuhagay ni Green Lancers coach Elmer “Boy” Cabahug dihang gikahinabi ning mantalaan kagahapon.

Human niya natuboy ang Green Lancers ngadto sa ikasiyam niining sunodsunod nga Cesafi title ning bag-uhay, si Slaughter ug mismong ang UV management ningpabuhagay nga hayan magtutok na ang Fil-Am giant isip sakop sa Smart Gilas-RP developmental team.

Sun.Star accepts donations for victims of Typhoon Ondoy

Apan gitataw ni Cabahug nga dili pa kini mahitabo sa sunod tuig tungod kay nakadesider si Slaughter nga tiwason ang iyang kursong accounting management sa UV diin usa na lang ka tuig ang iyang kuwang.

“One year na man lang sab gud ang kuwang ni Greg para mahuman niya ang iyang course, anugon sab kon iyang undangan,” pasabot ni Cabahug.

Nagkanayon si Cabahug nga mao sab gyud kini ang gustong mahitabo sa tag-iya sa UV nga si Cong. Eddie Gullas kabahin kang Slaughter.

“Gusto ni Sir Eddie ug gusto sab gyud ni Greg nga mahuman gyud niya ang iyang eskuwela. Gusto si Greg nga matawag siyang degree holder nga gikan sa UV,” dugang ni Cabahug.

Gitino ni Cabahug nga wa kini nagpasabot nga di na moduwa si Slaughter sa national team tungod kay mao man sab gyud kini ang usa sa mga pangandoy sa ilang pambatong sentro.

Matod ni Cabahug nga sama sa ilang gibuhat, paapilon gihapon nila si Slaughter sa training sa national team kon di kini makasumpaki sa iyang eskedyul sa pagtungha ug sa Cesafi tournament.

Apan ning puntoha, giklaro gyud ni Cabahug nga di pa nila papirmahon og kontrata si Slaughter sa national team kay gusto pa niini nga moduwa sa Philippine Collegiate Champions League (PCCL).

Isip kampiyon sa Cesafi, ang Green Lancers nakakuha nang daan og puwesto sa PCCL Sweet 16 kansang kombati sugdan karong Nobiyembre 23 sa Manila.

“Kon mopirma gud siya’g contract sa national team, di na man siya makaduwa sa Champions League,” pasabot ni Cabahug.

Matod sa kanhi tirador sa Philippine Basketball Association (PBA) nga sud ning semanaha, makighugpong kanila ni Slaughter si Cong. Gullas alang sa du­gang pang lakang nga ilang pagabuhaton para sa kaayuhan ni Slaughter.

Si Slaughter napili na sab nga MVP sa Cesafi karong tuiga apan ning higayuna, nakigbahin kaniya sa maong pasidungog ang higante sab sa runner-up University of Cebu (UC) Webmasters nga si 6’10” Junmar Fajardo.