TALIWA sa pagdaghan sa mga tigpaluyo ni Sen. Noynoy Aquino sa pagpalansar kaniya sa pagka-presidente sa 2010 election, di hinuon siya makapaabot og suporta gikan sa mga pro-life group.

Si Dr. Rene Bullecer, director sa Human Life International ug usa sa mga nag-unang lider sa pro-life group sa nasod, niingon nga hangtod karon nagpabilin sa ilang talaan sa mga anti-life lawmaker si Aquino.

For updates from around the country, follow Sun.Star on Twitter

Gitug-an ni Bullecer nga sukad pa sa pagka-kongresista ni Aquino, nahimo na kining supporter sa mga anti-life bill.

Dihang gipalabang ang House Bill 3773 kun ang Integrated Reproductive Health and Population Reduction bill, matod ni Bullecer nga gipangulitawhan gyud nila si Aquino aron babagan ang maong balaudnon apan napakyas sila.

Karong nahimo nang senador si Aquino, nisuporta na usab kini sa HB 5043 kun ang Reproductive Health bill.

Kon di mausab ang baruganan ni Aquino, matod ni Bullecer nga siguradong hagbong na si Aquino sa ilang himuong screening.

Nasayran nga nagkasabot ang mga pro-life leader tibuok nasod nga mopahigayon og one-on-one interview sa mga presidentiable sa di pa ang deadline sa filing of certificate of candidacy karong Nobiyembre 30 aron paghashas kon kinsa sa mga presidentiable ang ilang paluyohan sa 2010 election.

Nagpasalamat si Bullecer nga nangatras na ang ubang mga kandidato sa pagka-presidente ug gipaabot nga mas makunhoran pa ang gidaghanon ug kini makaayo aron mas minos ang pilianan sa umaabot piniliay.