AKTIBO pa ko nga aktibista kadtong panahon pa sa balaod militar dihang nadiskubrehan nako kining Ibon Foundation nga magdalit og mga research kabahin sa lain-laing mga isyo ug nalipay ko nga hangtod karon buhi pa ug aktibo kini.

Nakahisgot ko sa Ibon kay nadawat nako kagahapon ang usa ka email kabahin sa resulta sa survey sa Ibon kon si kinsa ang popular karon sa mga presidentiable.

Basi sa maong survey, nag-una si Sen. Noynoy Aquino nga dunay 32.15 porsyento karong Oktubre 2009. Nagsunod kaniya si Sen. Manny Villar nga nakapuntos og 19.32 porsyento dayon si Sen. Chiz Escudero nga nakakuhag 12.1 porsyento, ug Erap Estrada nga nay 6.75 porsyento.

Sun.Star accepts donations for victims of Typhoon Ondoy

Kay kining maong resulta nahisama ra sab sa mga survey nga gipahigayon sa Social Weather Station (SWS), makaingon gyud kita nga ang candidate to beat mao si Noynoy sa Liberal Party.

Sa akong pag-aninaw, anhi ni sila magdaog sa abilidad sa pag-convert sa anti-administration sentiment karon ngadto sa boto.

Nagtuo gyud ako karon nga ang piliay sa 2010 iya sa oposisyon ug magpili ang mayorya kon si kinsa ang angayan nilang suportahan nga magdala sa ilang sentimento batok sa administrasyon.

OPOSISYON

Sa pagkakaron, daw nakuha ni Noynoy ang mayorya sa mga anti-administrasyon. Gani, iyang nakuhaan ang suporta kang Escudero nga nikunhod sa lain-laing survey.

Sa akong panahom, napiangan kini si Escudero sa iyang pagsalig sa suporta ni Danding Coajuangco. Nagtuo ko nga ang iyang pagbiya sa Nationalist People’s Coalition (NPC) nagtumong sa pag-usab sa maong pagtuo.

Nagtuo kini nga makuha ang suporta sa mga ideyalista nga kabatan-onan nga sa pagkakaron wa ma gyud maporma pabor kang Noy-noy.

Samtang moingon ang mga beterano sa politika nga naghikog si Escudero sa iyang pagbiya kang Danding ug sa NPC, tan-awon nako kon madani na ba niya karon ang mga botante nga anti-administrasyon.

VILLAR

Alang kanako, lahi kining kaso ni Manny Villar nga nangampanya basi sa iyang slogan nga “Sipag at Tiyaga.”

Kalit nga naapsan siya ni Noynoy tungod kay wa man mangampanya siya basi sa mga anti-administrasyon nga panawagan. Sa iyang labing ulahi nga mga pamahayag, iyang gisaway kini si Noynoy basi sa performance ug kapasidad nga modala sa nasud inig kadaog sama sa kampanya sa kandidato sa administrasyon nga si Defense Sec. Gilbert Teodoro.

Tan-awon nato kon mosalir ba kini alang kang Villar apan sa akong pagtuo, mas mosaka ang iyang ratings sa mga survey kon magsugod siya pagsaway sa performance sa administrasyon karon.

LAING OSMEÑA

Nag-text nako kagahapon si Rico Osmeña isip reaksyon sa akong lindog kabahin sa kadaghan sa mga Osmeña nga modagan sa Syudad sa Sugbo.

Matod pa niya, kulang kini. Ug nakahinumdom ko nga nagplano sab diay siya nga modagan alang sa pagka kongresista sa unang distrito batok kang Cutie del Mar.

Na hala.

Naa na si Sonny O, Georgia, Tomas ug Margot. Ug nagtuo ko nga modagan sab pagbalik si Richie Osmeña.