NAGPABUTO’G three-point bomb si Rommel Luceño sa nahabiling 14 segundos aron ituboy ang University of Cebu (UC) Webmasters ngadto sa overtime nga kadaugan, 71-70, batok sa 8-time champion University of the Visayas (UV) Green Lancers kagabii sa Game 2 sa college division finals series sa Cebu Schools Athletic Foundation Inc. (CESAFI) sa Cebu Coliseum.

Unya sa return play, nakailog pa gyud og bola si Luceño nga mao nay naghatag og agianan sa Webmasters nga makatabla sa best-of-five championship series, 1-1.
Sama sa Game 1, sayong nakabulhot ang Webmasters ug dali kining nakaposte og 20-4 nga labaw.

"The Manny Pacquiao Blog". Click here for stories and updates on the Filipino boxing champ.

Dala ang kasingkasing sa usa ka kampiyon, hinayhinay nga gikitkit sa Green Lancers ni coach Elmer Cabahug hangtod nga nailog gyud nila pagbalik ang labaw, 62-61, sa nahabiling 1:44 minutos sa regulation period.

Ang 6’10” giant sa Webmasters nga si Junmar Fajardo maoy nakapugos og overtime dihang napasulod niya ang usa sa iyang duha ka freethrows.

Sa pagpangulo na sab ni Fajardo, nakalabaw ang Webmasters, 65-62, sa sayong bahin sa overtime apan ningbawos ang Green Lancers og 6-0 nga rally sa pagpangulo ni Ritchum Dennison aron ilugon ang labaw, 68-65, sa nahabiling 2:12 minutos.

Sa nahabiling 32 segundos katapusang nakatilaw’g labaw ang Green Lancers, 70-68.

Human niadto, mao na ang mabayanihong nahimo ni Luceño, kinsa niamot og siyam ka puntos sa kadaugan.

Sa high school division finals Game 2, nakamaneho gihapon ang Cebu Institute of Technology (CIT) Wild Kittens pagpukan og balik sa University of San Jose Recoletos (USJ-R) Jaguars, 86-81, bisa’g kuwangan sila’g tawo.

Ang Wild Kittens ningkombati nga wala sila si Joseph Nalos, Carlo Figuracion ug John Gera, nga napahamtangan og season ban sa Commissioner’s Office gumikan sa nahitabong kasamok sa Game 1.

Ang Wild Kittens, nga nakaposte na og 2-0 nga bintaha sa best-of-five series, gikasamtangan pang nag-apelar sa kaso sa ilang tulo ka mga sakop ngadto sa Cesafi board.

Nagbangis si Mark Jayven Tallo ug gipangulohan niya ang Wild Kittens pinaagi sa iyang 29 puntos samtang nidugang og 23 puntos si Wilkins Sanchez.

Sa laing bahin, nasakmit sa USC Warriors ang ikatulong puwesto sa college division human nila giusban pagbuntog ang USJ-R Jaguars, 91-79.

Puntos kada usa:

College Finals

UC (71)- Fajardo 27, Rogado 13, Abella 9, Luceno 9, Juliane 6, Mohamad 4, Cayanong 3. UV (70)- Slaughter 22, Dennison 11, Diputado 10, Olivares 6, Senires 6, Manigque 6, Mercader 5, Cincoflores 3, Lao 1.