GUBOT? Kon modayon pagdagan pagka mayor si kaniadto Sen. Sonny Osmena sa dakbayan sa Sugbo morag gubot pas lukot unya ang pulitika ug piliay dinhi sa dakbayan.

Daghan nangutana nako kon desido o nagbugal-bugal ba lang kaha si Sonny Osmena sa iyang gipalanog nga estorya nga modagan siya pagka mayor sa dakbayan sa Sugbo.

Sa tinuoray lang ang nakahibawo aning tanan si Sonny Osmena ra gyud. Apan kon tinuod nga mibalhin na siyag pag-rehistro sa Barangay Camputhaw, dakbayan sa Sugbo gikan sa Ibo, Toledo city, morag makatuo tang modagan siya.

Sun.Star accepts donations for victims of Typhoon Ondoy

Kon mahitabo ni morag ang akong higala sa nga si Bise Mayor Mike Rama ang mahibutang sa alaot. Duha na ka Osmena (si Sonny ug Georgia) ang maatbang ni Bise Mayor Rama unya sa 2010 nga piliay.

Makahibong kay si Mayor Tomas Osmena wa moatake ni Senador Sonny sa iyang planong modagan pagka mayor sa dakbayan. Gani giimbitar pa ni Sonny nga padaganon pagka bise mayor si Mayor Tomas.

Di ba kataw-anan nga ang mga Osmena mag-ilog sa dakbayan? Maayo gani kay si Margot, asawa ni Mayor Tomas, modagan na lang og konsehal di na magmayor.

Si Georgia nga manghod ni Mayor Tomas dugay rang nideklarar nga modagan pagka mayor bisan og gi-indorsar na ni Mayor Tomas si Rama nga maoy kandidato sa BO-PK pagka mayor.

Apan ang lawom nga rason nganong modagan si Sonny pagka mayor sa dakbayan tungod kay, matud pa niya, si Winston Garcia, presidente sa GSIS ug manghod ni Gob. Gwen, modagan pagka mayor.

Si Sonny nagkanayon nga si Rama huyang ug sayon pildihon ni Winston tungod kay daghan og kwarta si Winston.

Si Georgia, gidudahan ni Sonny nga gisuportahan siya ni Gobernador Gwen. Gani tungod niini gidungog nga modagan pagka mayor si Margot. Si Georgia ug Margot dili maayog buot sa usag usa.

Dunay basi ang pagduda nga si Georgia gisuportahan ni Gob. Gwen tungod kay sa dihang nakighinabi siya sa mga magsusulat sa mantalaan ug komentarista sa radyo diha ang mga alalay ni Gob. Gwen.

Ang rason ni Sonny nganong modagan siya pagka mayor ug is Mayor Tomas ang iyang bise mayor aron kuno maprotektahan ang interes ni Mayor Tomas sa SRP (South Road Properties).

Niapil na si Sonny sa internet, ang bag-ong pamaagi sa pangampanya aron iyang maabot ang kabatan-onan ug kadtong tua sa gawas. Matud pa sa taho mirehistro si Sonny sa You Tube ug Facebook.

Sa laing bahin morag maingon tang pung nga nahadlok modagan pagka gobernador si Sonny. Gihagit siya ni Gobernador Gwen nga modagan kay sa iyang itulak si Tourism Sec. Ace Durano nga nagukon-ukon nga modagan pagka gobernador.

Daghan ang nagpa-abot nga modagan unta si Sonny batok ni Gob. Gwen aron makita ang katag sa duha ug sa pamilyang Osmena ug Garcia. Ang pagbalhin ni Sonny sa dakbayan nagpakita lang nga di siya andam modagan sa probinsiya.

Gawas nga nakagamot na si Gob. Gwen sa probinsiya daghan pa gyud ang ilang kwarta. Mao ni usa ka rason nga nahadlok si Ace Durano ug si Sonny nga modagan pagka gobernador.

Si kaniadto Kon. Junjun Davide modayon ba kahag pagdagan pagka gobernador nga apiki na man kaayo ang panahon?