BARANGAY tanod gitumbok nga maoy nipusil patay sa usa ka batan-ong lalake nga gikan nga niduaw sa lubong sa iyang mga paryente sa sam-ang sa mao nga dapit.

Napalgan sa patay nga lawas ni Eric Fuentes, 26, ang usa ka replika sa kalibre .45 ug lima ka mga pakite sa gituohang shabu dihang siya nakaplagan pasado alas 4 kagahapon sa kaadlawon sa New Imus road, Barangay Lorega, siyudad sa Sugbo.

Sun.Star accepts donations for victims of Typhoon Ondoy

Si Fuentes nagpuyo na sa brgy. Camputhaw apan ang iyang mga ginikanan nagpuyo sa Lorega.

Ang suspek giila sa kapulisan nga si barangay tanod Bryan Mabaga, dugay na nga tanod sa Barangay Lorega.

Nasayran sa kapulisan nga nga daghan na og gipusil diha sa maong barangay ang suspek, apan way nireklamo tungod sa kahadlok.

Sigun sa pasiuna nga taho nga nakutlo sa Sun.Star Superbalita, si Mabaga mao pay nanawag sa kapulisan sa Pari-an aron pagpahibawo nga may tawo nga gipusil sa New Imus Road.

Niresponde ang kapulisan ug maoy ilang naabtan sa dapit ang biktima nga nagbuy-od daplin sa karsada.

Si PO3 Geofrey Gutual sa Homicide Section nagkanayon nga naalarma ang mga tawo sa Lorega human makita ang biktima nga may gitakin sa iyang kilid.

Gisita si Fuentes ni Mabaga, apan nidagan kini hinungdan nga nahitabo ang ginukdanay.

Pagkataudtaod nadungog sa mga tawo ang buto-buto sa armas de fuego.

Napalgan sa kapulisan ang usa ka toy gun kalibre .45 ug laing lima ka mga pakite sa gituohan nga shabu nga gisulod og container sa usa ka vaporub.

Si barangay tanod Jacinto Requiron nga nahinabi sa Sun.Star Superbalita niingon nga gigukod ang biktima uban sa laing kauban niini sa usa ka tawo gikan sa sam-ang sa Lorega San Miguel.

Niabot ang ginukdanay sa mao nga lugar nga nahitaboan sa pagpamusil.

Duha ka mga buto sa armas ang nadungog sa mga tawo ug wa magdugay, napalgan ang biktima nga nagbuy-od.

Si Requiron wa motumbok kung si kinsa ang namusil.

Apan ang mga lumolupyo sa dapit nga nakasaksi sa maong hitabo nitumbok kang Mabaga nga maoy namusil.

Dugang taho nasayran nga nauli pa nianang alas 3 sa kaadlawon si Fuentes sa balay sa iyang inahan.

Nangita kini og kutsilyo kay gusto nga manimawos sa tawo nga nikulata kaniya.

Gipugngan pa kini sa inahan ug sa igsuon apan dali kining nigawas sa ilang balay.

Pipila ka mga minuto ang nakalabay, nahitabo ang pagpamusil.

Si Jeralyn Fuentes, manghod sa biktima, niingon nga nag-inom ang iyang igsuon uban sa laing duha niya ka mga manghod ug silingan sa dihang niabot si Mabaga.

Si Mabaga nagkupot na daan og armas ug nagtion kang Fuentes.

Daghan ang nakakita nga niisa sa iyang mga kamot ang biktima apan gipusil gihapon ni Mabaga.

May nakakita usab nga si Mabaga maoy niitsa og toy gun duol sa gihagbaan sa biktima.