WA kapiog ang gipasiatab nga modernong Cebu South Bus Terminal sa dakong bul-og sa katawhan nga nanguli alang sa Kalag-kalag.

Daghang mga pasahero nga nagbuwad sa init sud sa kapin sa tulo ka oras didto sa gawas sa terminal.

Sun.Star accepts donations for victims of Typhoon Ondoy

Moderno lagi, pero wang kapangandam nga magbaha gyud ang mga pasahero sa mga mahinungdanong adlaw sama sa Kalag-kalag.

****

“Naunsa na man ni sila, nganong wala man ni nila gitarong ug paghan-ay? They should have put up railings or barriers to organize the lines outside,” matod pa Tining
Bacaltos, usa sa mga pasahero nga taga Barangay Simala, Sibonga.

Usa lang siya sa gatosan ka mga psahero nga nag-agwanta sa naglagiting nga kainit sa adlaw sa gawas sa terminal. Kon isda pay gibuwad, labtingaw na.

****

Ang mahabang duot sa katawhan nga mopauli sa kalungsoran panahon sa kalag-kalag timailhan sa malungtarong tradisyon sa mga Pilipino sa pagtahod sa atong mga minahal sa kinabuhi. Mitaliwan na sila sa laing kalibotan apan lab-as pa sila sa atong mga panumdoman.

Kaay di nato mahikalimtan ang atong inahan nga maoy nagmatuto kanato ug maoy nagtabyog sa atong duyan.

****

Bisan kadtong labing matig-ag kasing-kasing moduaw sa mabugnawng lubnganan sa ilang mga minahal sa kinabuhi.

Kay mananginting pa sa ilang mga dunggan ang ilang mga talidhay sa panahon sa kamaya ug makita pa nila ang pagkisdom sa langit ug ang pagdaligdig sa mga luha sa panahon sa kasub-anan.

Mahinumdom sa kalipay ug kasakit nga ilang gisaw-an ug mangaliya sa kahitas-an nga langit maoy ilang sangkoan.

****

Mao bitaw nga dihay niaduaw sa sementeryo. Nabaling ang iyang pagtagad sa usa ka tawo nga sa iyang paminaw nagsigig hilak atubangan sa usa ka netso.

Nakuryuso siya ug nagpaduol sa maong tawo.

Sa dihang naklaro na niya kon naghilak ba ang maong tawo, iyang nasuta nga nagkanta man diay ang maong tawo og “Happy birthday to you.”

****

Dihay laing tawo nga naghilak atubangan sa usa ka netso ug nagbalik-balik sa pag-ingon,

“Nganong namatay man ka?” Lagi kay nakuryuso man siya, iyang giduol ug gipangutana kon iyang ba kining amahan o inahan. Igo lang nga nilingo-lingo ang maong tawo.

Dihang iyang gipangutana kon iya bang anak ang namatay. Nilingo-lingo gihapon ang maong tawo.

”Kinsa man diay nang namatay?” nangutana siya. Tubag sa maong tawo, “Mao ni ang unang bana sa akong asawa. Akoy nakasawo sa iyang kaabubhoan ug kamaldita.”