Homer V. Landiza
Ronda, Cebu

Wala nay timailhan ang ilang mga lubnganan.
Ang kahoyng balabag natun-as na’s katuigan.
Gani ang kanhing bungdo nga nila gilubngan
Sa maanindot nga mga nitso kini gipulihan.

Sun.Star accepts donations for victims of Typhoon Ondoy

Maayo gani kay sa akong pagpangutana
Sa magbalantay sa sam-ang ug sa tagdumala,
Ang mga bukog sa lubong nga ilang gipapulihan,
Sa tiilan sa dakong krus na sila makit-an.

Ug sa akong pag-aginod ngadto sa unahan
Nunot sa duot sa mabaga nga katawhan,
Didto sa tiilan sa dakong krus akong namatud-an,
Nagtipun-og mga kalabera sa kabos nga kaigsuonan.

Dili baya sa kaanindot sa lubong pagahukman
Ang usa ka tawo sa iya unyang pagtaliwan,
Kundili sa iyang nahimo nga mga binuhatan
Sa iyang pagpuyo dinhi ibabaw sa kalibutan.

Gidagkutan ko ang akong dala nga mga kandela
Alang sa mga kalag sa nitaliwan kong mga pinangga,
Uban ang pag-ampo ug panghinaot nga labing hingpit,
Nga ang kabos kong pangaliya dunggon sa langit.

Giapil usab nako sa akong mga pag-ampo
Ang mga kalag nga wala na kanilay nangaliyupo,
Aron sa kinabuhing dayon sila pagagantihan
Sa atong Labing Makagagahom sa kahitas-an.

Niining halandumong adlaw sa mga mingtaliwan
Sa kinasingkasing pag-ampo ato silang halaran,
Kay maoy kalipay sa atong mga dughang gibayaw
Nga sila makaambit sa Iyang Langitnong kalinaw.