TULO ang nangamatay sa duha ka managlahing mga pagpanulis sa lalawigan sa Sugbo.

Usa sa mga biktima mao ang asawa sa kanhi bise-mayor sa lungsod sa Barili, kinsa gipusil patay sa mga tawo nga nanulis kanila.

Sun.Star accepts donations for victims of Typhoon Ondoy

Laing nangamatay mao ang usa ka tiguwang babaye, iyaan sa kanhi taas nga opisyal sa Cebu Provincial Police Office (CPPO) ingon man ang iyang babayeng katabang sud sa iyang balay sa Bogo city.

Naalarma na ang director sa CPPO tungod sa duha ka mga hitabo mao nga iyang gimandoan ang mga hepe sa kapulisan mao nga mga lungsod nga sulbaron gilayon ang mao nga mga krimen.

Niadtong Miyerkules sa alas 8 sa gabii sa barangay Mantalongon, lungsod sa Barili, ang managtiayong Luisito Ponsica, kanhi bise mayor sa lungsod ug negusyante, ug iyang asawa nga si Gina, giatangan sa duha ka mga tawo dihang mosud na unta sa gate sa ilang balay.

Laing duha ka mga tulisan nga silbeng back-up ug nagmotorsiklo gihapon diha ra sa duol nagtan-aw.

Samtang nag-urong ang ilang sakyanan kay naghuwat nga ablihan ang gate, kalit lang niabli sa pultahan sa sakyanan ang usa sa mga tulisan dayon nilabni sa bag nga gidala ni Gina dayong deklarar og tulis.

Human malunggob ang bag, gipamusil ang magtiayong Ponsica.

Si Gina naigo sa dughan ug tiyan hinungdan nga namatay diha-diha samtang si Luisito dunay mga samad pinusilan sa tiyan, paa ug kamot.

Wa siya maintimano kay nakakanaog ug nakadagan pa gikan sa sakyanan.

Ang magtiayon daling gidala sa South General Hospital sa siyudad sa Naga, apan patay na gyud si Gina.

Luwas na sa makuyaw nga kahimtang si Luisito kay di fatal ang iyang mga samad.

Ang upat ka mga tulisan nga pulos nagtaptap sa ilang mga nawong ningsibat gamit ang ilang duha ka mga motorsiklo nga walay plate number.

Matod sa mga saksi nga nipadulong sa Mantalongon-Aloguinsan road ang upat ka mga tulisan.

Nadala sa mga tulisan ang bag nga dunay sud nga kuwarta nga wa pa matino kon pila.

Nakuha sa kapulisan gikan sa crime scene ang duha ka mga kabhang sa bala sa .45 caliber pistol ug duha ka mga kabhang sa 9mm pistol.

Si Chief Insp. Alexander Soledad hepe sa Barili Police Station niingon nga tulis maoy ilang gitan-aw nga motibo sa kremin sanglit mamalitay man og kopras ug kahayopan sa ilang dapit ang magtiayon.

Posibleng nasundan gyod ang duha ug na-pattern ang ilang mga lakaw human masayri nga nag-withdraw silag kuwarta sa banko nga dakong kantidad agig pagpangandam sa tabo sa barangay Mantalongon.

Samtang, ang ikaduhang pagpanulis nahitabo sa A and B Subdivision, sa barangay Cogon, Bogo city, pasado alas 2:00 sa kaadlawon niadtong Miyerkules.

Ang biktima nga gipatay giila nga si Beatriz Aguisanda Ocaba, 84 ,byuda, giingong iyaan ni retired Senior Supt. Alberto Aguisanda, kanhi deputy provincial director for administration sa CPPO.

Lakip sa gipatay mao ang iyang katabang nga si Merlinda Gallardo Olmares, 49, minyo ug stay-in sa balay sa iyang amo.

Una niini, ang managtiayong Emelgin ug Linar Invento nakadawat og text message sa ilang paryente nga atoa sa gawas sa nasod nga ipasusi ang balay sa biktima tungod kay nagsegi silag tawag apan way nitubag.

Niadto ang managtiayon apan maoy ilang nakita nga naligo na sa dugo ang mga biktima sulod sa balay.

Ang managtiayon daling ni-report sa kapulisan ug base sa imbestigasyon, ang killer o mga killer nisulod sa balay agi sa bintana sa luyo.

Ang mga biktima dunay mga samad dinunggaban sa nagkadaiyang bahin sa lawas.

Nakuha gikan sa balay sa mga biktima ang kuwarta nga kapin sa P20,000 ug mga nagkadaiyang matang sa alahas.

Tungod sa duha ka mangilngig nga mga krimen, si Senior Supt. Jesus Gaquing nimando sa duha ka mga hepe sa kapulisan nga sulbaron ang kremin ug dakpon ang mga suspek aron mapasakaan gyod og kaso.

Hinuon iyang gitataw nga local boys lang ang nihimo sa kremin ug posebling nalambigit na usab sa ubang mga pagpanulis. (dugang taho ni JECT)