NAPAIG ang lawas sa usa ka 3 anyos nga batang babaye human malakip sa pagkasunog sa ilang balay sa siyudad sa Toledo sa miaging gabii.

Gituohan nga natumba nga kandila nga dinagkutan sa may altar sa balay sa magtiayong Manubag ang sinugdanan sa sunog.

Nakalingkawas hinuon ang magtiayon sa sunog pasado alas 9:00 sa gabii niadtong Dominggo sa barangay Das-Kimwa, sa maong siyudad.

Sun.Star accepts donations for victims of Typhoon Ondoy

Ang kapulisan sa Toledo nakadawat sa alarma sa sunog hinungdan nga dali usab silang niresponde.

Apan sa ilang pag-abot didto na ang mga bumbero.

Hingpit gyud nga naugdaw ang balay sa mga Manubag tungod kay ang balay ginama man lang sa kawayan.

Matod ni Isabelo Manubag, amahan sa biktimang si Mariel, nga nahinanok na silag maayo sa wa pa ang sunog.

Dako na kaayo ang kayo dihang sila nahigmata ug wa na silay higayon pa sa pagsalbar sa ilang anak nga nahinanok sab.

Ang taho wa magbutyag kon diin matug ang bata sa bahin sa balay.

Nakagawas ang magtiayon gikan sa nagdilaab nga balay, apan wa nila madala ang ilang anak.

Paig nang nakaplagan ang bata sa naugdaw nga balay.

Nasayran sa kabumberohan nga ang pamilyang Manubag nagdagkot og kandila sa ilang altar agig halad atol sa Adlaw sa mga Santos.

Gawas sa naandang dinagkutang kandila, naghalad sab sila og mga pagkaon sa altar.

Nagtuo ang kabumberohan nga nahilis na o natumba ang kandila dihang nalanay na ug nisilaob hinungdan sa sunog. (Dugang taho nila ni Madine B. Sabang ug Czarina Francesca Talon-STC Interns)