MIHAKOT ang Cagayan de Oro table tennis team og duha ka gold, usa ka silver ug tulo ka bronze medal atol sa 3rd Philippine Olympic Festival National Championship nga gipahigayon niadtong Disyembre 11-16, 2008 sa Don Gregorio Pelaez Sports Center.

Ang unang gold medal sa Cagayan de Oro table tennis team nasakmit ni Xyjan Ramos sa boys' 20 years old and under event human giparot si Leo Sacopla sa Quezon Province, matud pa ni tournament manager Dario Hernane.

Si Janine Dy maoy mihatag sa ikaduhang gold medal sa Team CdeO human gipildi si Anna Monica Bordado sa Iligan City atol sa finals sa girls' 14 years old and under event.

Ang nag-inusarang silver medal naangkon ni Sergio Louie Benoya human naparot kang gold medalist Eugene Paradela sa Iligan City sa boys' 14 years old and under championship match.

Ang duha ka bronze medal naangkon ni Mary Ann Palmero sa girls' 14 years old and under event ug girls' 17 years old and under event, samtang ang ikatulong bronze medal naggikan kang Bryan Kim Hernane sa boys' 20 years old and under event.

Ang 3rd Philippine Olympic Festival National Championship gisalmotan sa 66 ka local government units sa tibuok nasud nga gi-organisar ni POF chairman Robert Aventajado ug host Misamis Oriental Governor Oscar Moreno. (City Information Office)