USA ka tanod ang gipusil samtang naglibot suroy kagahapon mga alas 2:00 sa kadlawon sa Barangay Taglimao ning siyudad sa Cagayan de Oro.

Giila ang biktima nga mao si Pepito Enriquez, 32, minyo, sa susamang dapit.

Sa gihimong pakighinabi sa Sun.Star Superbalita sa usa sa personahe sa Northern Mindanao Medical Center (NMMC) diin gidala ang biktima human sa pagpangluthang.

Nasayran nga igo lang nga nananghid ang biktima nga mangihi atol sa ilang gipahigayong pagpatrolya sa tibuok barangay.

Ug isip tanod kanunay na niining buhaton ang obligasyon matag gabii tungod usab sa namatikdang kagubot sa maong dapit.

Human sa pagpananghid niini nga mangihi nipaingon kini sa ngitngit nga bahin apan nakurat na lamang ang mga kauban niini dihang nakadungog og kusog nga buto.

Dali nga nangdagan ang mga kauban ug nangita asa nagikan ang buto ug nakita na lamang nilang nagbuy-od ug nagkamang nga nagpatabang si Enriquez kinsa naigo ang sampot nga bahin.

Gipangita pa sa mga kaubang tanod ang responsabli sa pagpamusil apan wala na nila makita ug gituohang dali nga misibat. Wala usab mahibaw-i unsa nga klase sa armas ang gigamit sa suspetsado.

Tungod sa samad nga naangkon, dali nga gidala ang biktima sa NMMC kinsa padayon pa nga giobserbahan sa mga doktor ning panahona.

Hinuon ang kaso gisunod na sa Police Station 8 (PS8) sa Lumbia.