GIAGHAT sa kongresista sa ikaduhang distrito sa dakbayan sa Cagayan de Oro ang Senado nga suportahan ang House Bill 5816 nga mahimong sulbad sa grabe nga korupsiyon ug magtinabangay nga masumpo kini sa hingpit.
 
Ang HB 5816 nga gipangamahan ni Rep. Rufus Rodriguez, sa Ikaduhang Distrito ning siyudad nagtinguha alang sa direkta nga pag-amendar sa prescriptive period sa Republic Act 3019 nga mas nailing Anti-Graft and Corrupt Practices Act, gikan sa 15 ka tuig ngadto sa 30.
 
Si Rodrigues masaligon nga ang pagdugang og laing 15 ka tuig maghatag og higayon sa Sandiganbayan labina sa Office of the Special Prosecutor (OSP) nga madala sa korte ang mga malapason.
 "And avoiding any possibility of their getting off scot-free on the basis of mere technicality which would be the prescription period for their offense," ang kongresista nagkanayon.
 
Samtang gitumbok usab ni Rodriguez ang pipila sa mga rason nganong dili masilotan ang mga kurakot nga mga empliyado ug opisyal sa gobiyerno ug kini naglakip na sa kakulangon sa mga personahi sa OSP, kulang sa training programs ingon man daghan nga gihuptan nga mga kaso.

Giuyonan usab sa maong kongresista nga bisan nagpabilin nga usa ka dakong hulga sa huyang na nga istado ang korupsiyon sa gobiyerno apan naghatag usab kini og mga pagduda sa kamatinud-anon sa mga lideres nasyonal nga malimpiyuhan ang maong suliran.

"We must support our frontliners and provide them with weapons they need to ensure a higher rate of conviction against erring parties," matod ni Rodriguez.
 
Gikan sa kategorya nga ika-131 niadtong 2007, ang Pilipinas natagak ngadto sa ika-141 sa Transparency International (TI) sa 2008 report diin kalinya niini ang nasud sa Camerron, Iraq ug Yemen.