DILI na mahitsura ang nawong sa usa ka lalaki ug wala na ang duha ka mga mata dihang napalgan nga nagbitay sa punoan sa kahoy kagahapon mga alas 12:30 sa udto sa Corrales Avenue Corner, CM Recto ning siyudad sa Cagayan de Oro.

Gibuboan pa og grasa ang tibuok parte sa lawas sa biktima hinungdan nga ang gisul-ob niini dili na masuta ang kolor.

Samtang naabhak na usab ang nawong niini.

Ang biktima nagluhod ug gihiktan ang liog og pisi nga gihikot punoan sa kahoy. Kini base sa nakita sa Sun.Star Superbalita atol sa pakisusi sa maong dapit.

Si PO3 Marvin Bolanio sa Police Station 2 (PS2) sa Cogon nibutyag sa Sun.Star Superbalita nga usa ka construction worker ang nitaho sa ilang buhatan ug nipahibalo nga aduna kini nakitang patayng lalaki nga nagbitay sa kahoy.

Gibutyag sa maong construction worker nga nalabyan niini ang biktima niadtong petsa 1 sa hapon apan wala lamang gitaho sa kapolisan.

Duha ka anggulo ang gitutokan sa kapolisan sa maong hitabo nga posibleng naghikog ang biktima o gi-salvaged.

Kwestyonable usab ang kamatayon sa biktima tungod sa kadaot sa hitsura niini kung ugaling naghikog man.

Matud ni Bolanio nga gibana-banang mag-usa na ka semana sa maong dapit ang patayng lawas.

Adunay pamilya nga nangita sa ilang kabanay atol sa pagresponde sa maong hitabo apan dili makakumpirma kung mao ba ang gipangita tungod sa kapuno sa lawas sa grasa ug dili pa maila.

Sa pagsulat ning balita giatiman pa sa Scene of Crimes Operatives (Soco) ang patayng lawas nga natigayong dalhon sa Bollozos funeral parlor.