NAILA na ug deretso nga gilubong ang patayng lawas nga nagbitay sa punoan sa kahoy niadtong Martes mga alas 12:30 sa udto sa Corrales Avenue corner CM Recto ning siyudad sa Cagayan de Oro.

Giila sa asawa ang patayng lawas nga mao si Erdan Rey Sumagang, 30, minyo, taga Tiano-del Pilar St., ning siyudad.

Si Insp. Nelsedaca Villanueva sa Scene of Crimes Operatives (SOCO) nga nahinabi sa Sun.Star Superbalita nibutyag nga posibleng naghikog gyod ang biktima tungod kay base sa ilang nakuhang impormasyon sa pamilya nasayran nga nagsugod og kaguol ang biktima dihang natangtang kini sa trabaho.

Adunay higayon nga magsige kini og ingon nga maghikog hinungdan nga gibantayan kini sa pamilya nga dili mahimo ang plano niini.

Apan niadtong Oktubre 22 ning tuig nilakaw sa ilang balay si Sumagang nga wala namatikdan sa asawa. Giingong gipangita kini sa pamilya apan wala nakita.

Gibutyag ni Villanueva nga ang pagkawala sa mata ug pagkaabhak sa nawong sa biktima posibleng tungod sa gidugayon na sa pagkamatay niini.

"Posibleng gipangkaon na sa langgam ang laing parte sa nawong labina nga open field ang maong dapit," dugang ni Villanueva

Human sa gihimong imbestigasyon gidala deretso ang patayng lawas sa Bolonsori Cemetery aron ilubong ug didto nakumpirma sa asawa nga iyang bana ang maong lalaki tungod sa giingong wedding ring nga nakuha sa kamot niini ug ang panglawas usab sa biktima.