DEAD on arrival sa balay tambalanan ang usa ka 60 anyos nga lolo human nahulog sa punoan sa lumboy niadtong Huwebes mga alas 10:00 sa buntag sa Purok-1, Gusa ning siyudad sa Cagayan de Oro.

Nakabsan sa iyang kinabuhi si Teofilo Quipit, minyo human nawad-an og balanse samtang nisaka sa maong punoan.

Nasayran nga gibati og kaibog si Quipit sa mga hinog nga lumboy. Tungod kay wala may masugo nga mga bata labina nga oras sa tingklase niadtong higayona hinungdan nga niunay kini pagsaka sa punoan sa lumboy.

Pag-abot niini sa ibabaw nga bahin, nawad-an kini sa balanse ug maayong pagkahulog.

Nabunal ang ulo sa biktima ug nabundak ang lawas sa yuta diin adunay parte sa bukog sa biktima nga giingong nabali.

Dihang nadungog sa silingan ang kusog nga labunog gidali nila pagtan-aw ug nakita nila nga nagbuy-od si Quipit.

Dali nga gidala sa Northern Mindanao Medical Center (NMMC) ang biktima apan gideklarar kini nga patay sa doktor sa paghidangat.

Gituohang wala na naagwanta sa biktima ang grabeng naangkon nga bun-og.

Sa pagsulat ning balita gidala na sa mismong puloy-anan ang patayng lawas sa biktima.