NAGBUY-OD ug naligo sa iyang kaugalingong dugo nga nakaplagan sulod sa opisina ang 25 anyos nga dalaga human giayo og luba sa Purok 17 Poblacion siyudad sa Valencia.

Giila ang biktima nga mao si Liezl Torino-Voces, nagtrabaho isip kahera saÿNatures Spring Warehouse.

Sa gihimong pakighinabi sa Sun.Star Superbalita ngadto kang PO3 Renato Baltazar sa Valencia Police Station siya miingon nga posibleng nahitabo ang pagpangluba sa gabii dihang nag-overtime sa iyang trabaho ang biktima niadtong Nobiyembre 2, Adlaw sa Kalag-kalag.

Nakaplagan kini ni Gilbert Escolando, kauban sa trabaho ug driver sa delivery van mga niadtong Martes, Nobiyembre 3 mga alas 7:00 sa buntag dihang paingon kini nga mo-duty.

Nagkadugo ug wala nay kinabuhi ang biktima hinungdan nga nitaho si Escolando sa kapolisan.

Sa inisyal nga imbestigasyon nasayran nga ubay-ubay nga mga samad nilubaan ang naangkon sa biktima sa nagkalain-laing parte sa lawas.

Gituohang tulis ang motibo sa maong hitabo tungod kay nawala man ang cellphone sa biktima.

Hinuon, ang P200 mil nga anaa sa vault ang wala nadala ug posibleng wala nakita sa tulisan tungod kay nakatago kini.

Matud ni Baltazar nga posibleng nakigbugno pa ang biktima sa tulisan hinungdan nga kini giluba.

Giingong ang lugar sa sentro sa siyudad ug mingaw ang palibot niadtong tungora hinungdan nga walay nakatabang sa biktima.

Hinoun ang Scene of Crimes Operatives (SOCO) sa maong dapit padayon sa paghimo og imbestigasyon labina daghan ang nagtuong gilugos ang biktima una gipatay ug gikawatan.