NAKUHA ang kwarta ug personal nga gamit sa usa ka lalaki human giunay pagtulis sa iyang higala kagahapon mga alas 2:00 sa kadlawon sa Dolorez-Corales Avenue ning siyudad sa Cagayan de Oro.

Giposposan pa ang ulo og bato sa biktima nga mao si Romy Miake, 30, minyo, taga Brgy 23 ning siyudad sa Cagayan de Oro.

Nasayran nga nagbaklay ang maghigala kinsa wala maila ang panglan apan ang hitsura lamang niini niadtong higayona dihang paghidangat sa ngitngit nga bahin wala nabantayn sa biktima nga kalit lang siyang giposposan og bato sa ulo hinungdan sa pagkaligid ni Miake.

Human sa gihimong pagpospos gikuha dayon sa suspetsado ang iyang cash nga kwarta mobalor og P5,000.00 uban sa iyang cellphone human dali nga misibat.

Gitabang ang biktima ug gidala sa Northern Mindanao Medical Center (NMMC) kinsa padayon pang giatiman sa mga doktor.

Matud sa pipila ka personahe sa NMMC nga nahinabi ning mantalaan nga wala magdahom ang biktima nga unayon siya pagtulis sa iyang higala labina nga pipila na ka higayon silang nag-uban niini.

Apan nalimot lamang pag-ayo ang biktima sa pangalan sa suspetsado. Giingong desidido sab kaayo ang biktima nga pasakaan og kaso ang iyang higala sa gibuhat niini. (SVB)