Pipila lamang ang nahibalo sa mga dagkong hitabo diha sa Cagayan de Oro Water District (COWD). Bisan ang mga konsumante nga maoy tag-iya sa maong kompanya, tipik lang ang nahibaloan sa kasikas sa maong water utility. Angay nga manginlabot kita.

Ang kasamok sa COWD na naggumikan sa ma-anomalyang kontrata nga gipirmahan niini alang sa bulk water supply project sa tuig 2004.

Ang napirmahang kontrata sukwahi sa original contract: murag magic nga kalit lang nausab ug nahisukip ang mga probisyon nga makadaot sa COWD ug makaayo sa kontraktor. Usa niini nga kausaban mao ang paghatag sa kontraktor sa katungod nga magpataas sa singil sa tubig kung bout niini.

Bag-o lang miulbo nasab ang usa ka isyu: Angayan ba nga magpalit na sab ang COWD og tubig sa susamang kontraktor bisan kon walay hustong kapasidad ang water district sa pagbayad niini. Ang COWD nagabayad na daan og mokabat sa P12 milyones ngadto sa P13 milyones matag bulan sa Rio Verde. Ang dugang nga supply magkinahanglan na sab og P6 milyones kada bulan.

Luyo niini, ang naunang eskandalosong kontrata sa Rio Verde wala pa masulbad. Niaging tuig lang, gidid-an sa Commission on Audit ang bayad sa COWD ngadto sa Rio Verde nga mokabat sa P144 milyones. Pagkadako! Apan ang COA mismo ang miingon nga illegal kini tungod kay daan nang depektoso ang kontrata.

Mangutana kita: Nganong ipamugos man sa City Hall ug sa mga board of directors sa COWD ang bag-ong kontrata? Ayaw na tawon ninyo pug-i pa ang water district.