PATAY ang 50 anyos nga konduktor samtang angol ang kauban niini human nahulog ang dyip sa Dimapurog lungsod sa Talakag, Bukidnon.

Dead on the spot si Felix Gamalando, minyo, sa susamang dapit samtang angol ang kauban niini nga si Ever Branzuela, 23, minyo, sa susamang dapit.

Nasayran nga pauli na sa Talakag ang mga biktima sakay sa pampasaherong dyip dihang naglisod ang driver sa pagpasaka tungod sa kadanlog sa dalan ug tungod niini nius-os padulong sa ubos ug nahulog sa pangpang ang dyip.

Nahulog si Gamalando ug naipit ug nabunal ang ulo tungod kay naa kini nagkabit sa likod ug wala nakabantay sa hitabo.

Si Branzuela usab naipit ang tiil nga bahin dayon nadigyas ug nahulog sa pangpang hinungdan sa mga bun-og sa lawas.

Nasayran nga kusog kaayo ang ulan niadtong higayona.

Hinuon giingong luwas ang pipila ka pasahero nga anaa sa sulod sa dyip.

Apan si Gamalando ang nagrabehan, gani wala na kini nadala sa balay tambalanan tungod kay deretso kining nakabsan sa kinabuhi.

Samtang si Branzuela ang natabang ug anaa karon sa Northern Mindanao Medical Center (NMMC) kinsa luwas na sa makuyawng kahimtang.

Hinuon ang kaso padayon pang giatiman sa Talakag Police Station ingon man pagkuha sa dyip nga nahulog. (SVB)