NAKABSAN sa kinabuhi ang duha ka dalagita human nalumos niadtong Miyerkules mga alas 10:30 sa buntag sa Bonbon beach ning siyudad sa Cagayan de Oro.

Pulos mag-agaw ang mga biktima nga mao sila si Shiela Rose Cala, 14 ug Zena Mae Abonda, 13, pulos nagpuyo sa Ilaya, Carmen ning siyudad.

Matud sa usa sa personahe sa Northern Mindanao Medical Center (NMMC) diin gidala ang mga biktima nga nangaligo ang mag-agaw kay adunay giselebrar ang pamilya.
Nasayran nga nagpalayo ang mga biktima ug wala namatikdan nga lawom na ilang napadulngan.

Ang pamilya sab niadtong higayona anaa sa multicab nga gisakyan ug nangaon mao nga wala nakamatikod sa mga biktima nga layo na sa baybayon.

Usa ka ig-agaw nga lalaki ang nakabantay nga nagkapa-kapa sa dagat ang duha ka dalagita hinungdan sa kataranta nga gibati sa pamilya ug daling gitabang ug gidala sa baybayon nga bahin.

Nanglagom na ang mga biktima kinsa gituohang daghan na nga tubig ang nainom.

Gidali kini pagdala sa NMMC, gani si Shiela nakasuka pa og daghan tubig sulod sa balay tambalanan apan pipila ka minuto dungan nga nangakabsan sa ilang kinabuhi.

Ang mga hingtungdan dili makatuo sa nahitabo, nasayran nga dili kabalo molangoy ang duha ka mag-agaw.

Ang mga patayng lawas gidala na sa mismong puloy-anan.