WALA nay kinabuhi nga nakaplagan ang 17 anyos nga batan-on human naghikog pinaagi sa paghikot og kolor blue nga nylon sa iyang liog. 

Giila ang biktima nga mao si Sonny Bendijo, nagpuyo sa Lapaz Extension, Lapasan ning siyudad sa Cagayan de Oro.

Si PO2 Rodrigo Reyes sa Police Station 3 (PS3) sa Agora nibutyag sa Sun.Star Superbalita nga nakaplagan nga nagbitay si Bendijo kagahapon mga alas 6:30 sa buntag sa stall number 31 sa merkado sa Agora.

Lagom na ang biktima dihang nadiskobre ang hitabo. Bisan ang mga tupad niini sa pagkatulog wala makabantay nga naghikog na ang biktima.

Sa inisyal nga imbestigasyon nasayran nga putol ang walang bahin sa udlo sa biktima tungod kay kanhi na kini nalumos. Magsige kini og hisgot nga problemado sa iyang pamilya. Dunay panahon nga motabang kini sa mga mamaligyaay sa stall aron makahatag usab sa iyang pamilya bisan ginagmay lang nga kantidad nga mabalon sa pag-eskwela.

Nagtungha ang biktima og first year high school sa Lapasan National High School. Dili kini makapuyo sa ilang puloy-anan tungod kay sa stall si Bendijo matulog matag-gabii uban sa iyang mga higala.

Giingon sa inahan niini nga buotan nga bata ang iyang anak og makatabang pa kini kanila ug walay rason nga maghikog ang biktima.

"Siguro depressed siya sa kahimtang, sa iyang sitwasyon," matud ni PO2 Reyes.

Si Insp. Nelsedaca Villanueva sa Scene of Crimes Operatives (SOCO) nibutyag nga walay foul play sa kamatayon ug posibleng kadlawon gihimo niini ang paghikog.

Ning panahona gidala na ang patayng lawas sa Bollozos funeral parlor.